كل ما يخص قسم نظم ومعلومات حيوية بكليات الحاسبات والمعلومات

 قسم نظم ومعلومات حيوية  bioinformatics

اولا: هنتعرف علي القسم وايه الفرق بينه وبين اقسام حاسبات عام

ثانيا: هنتعرف علي الشغل وسوق العمل

ثالثا: هنتعرف علي طريقة التقديم في القسم بعد ثانوية عامة

رابعا: المصاريف في جامعات مصر

في البداية الكلام ده بيشمل كل اقسام البايوانفورماتكس في كل جامعات مصر لكن يمكن ان يكون هناك اختلاف بسيط بين جامعة واخري
 

اولا: هنتعرف علي القسم وايه الفرق بينه وبين اقسام حاسبات عام

القسم خاص في جامعة حكومية،يعني انت داخل كلية حاسبات ومعلومات حكومي بس القسم بتاعك ليها مصاريف خاصة عن باقي اقسام الكلية زي كلية تجارة انجليزي القسم ده خاص ليه مصاريف زيادة عن تجارة عربي.

الهدف من القسم باختصار انك بتدرس الرياضة التطبيقية وعلم الاحصاء وعلم البيانات والبايولوجي وعلوم الحاسب علشان تقدر تربطهم ببعض وتقدر تعمل ابليكشن طبي .علي سبيل المثال ....ابليكشن طبي يقدر يعمل مقارنة بين مجموعة من الDNA بيطلع وجه التشابه والاختلاف بينهم وهكذا

الفرق بين قسم بايوانفورمتك وباقي اقسام الكلية من حيث المواد : من كلمة بايوانفورماتكس هتلاحظ انها بتتقسم جزيئن بايو علم الاحياء، انفورماتكس علم المعلومات والبيانات ، انت بتدرس اول سنتين معظم مواد جينرال او حاسبات عام زيك زي باقي الطلبة االلي دخلين من علمي رياضة تقريبا هيبقي فيه فرق بسيط بس في كام مادة مختلفة عنهم بعد اول سنتين انت هتختلف في موادك عن باقي اقسام العام (الطلبة اللي دخلين من  علمي رياضة )لكن برضه هيكون فيه مواد بسيطة مشتركة بينك وبين باقي اقسام العام بس التركيز الاكبر هيكون علي مواد البيولوجي
   

الفرق بين البايوانفورماتكس ، الميديكل انفورماتكس،  والبايوميديكال انفورماتكس   :

1- البايوانفورماتكس : باخنصار هو التعامل مع البيانات الحيوية المختلفة زي RNA , DNA , Proteins , Enzymes والعلاقة بين اليات التشغيل لتحقيق وظيفة بيولوجية .  

2- الميديكل انفورمتكس : ده بيهتم بالاجهزة الطبية وتطويرها .

3-البايوميديكال انفورماتكس: ده بيجمع بين البايوانفورمتكس والميديكل انفورمتكس يعني بيهتم بالاجهزة الطبية وتطويرها والسوفت وير اللي جوة الاجهزة .

 

ثانيا: الشغل وسوق العمل

 الاسئلة اللي بتدور في دماغ كل واحد دلوقت :
هل القسم ده ليه شغل كتير في مصر؟
هل ينفع اشتغل زي حاسبات عام ؟
القسم هياهلني لسوق العمل ؟

 اولا شغل القسم في مصر حاليا بداء يزيد وينتشر الشغل بيكون في مراكز البحوث ، الطب الشرعي ،شركات الادوية ،وزارة الصحة ،  المستشفيات الكبيرة زي 57357 لكن الشغل بره مصر متوفر جدا  وبمرتبات عالية جداا لكن انت كاخريج حاسبات ومعلومات ينفع تشتغل زي اي حد في الاقسام العامة لانك بتدرس كل اساسيات البرمجة زيك زيهم بالظبط غير الدراسة في الكلية عامتا معتمده علي التعليم الذاتي يعني الكلية بتعلمك اساسيات كل حاجة لكن انت بتتعلم الباقي مع نفسك والنت واليوتيوب مليان لكن الكلية مش هتاهلك لسوق العمل بشكل كافي سواء في قسم البايو او اي قسم تاني فلازم من اول سنة ليك في الكلية تتعود انك تتعلم من النت واليوتيوب علشان محدش في الكلية هيديك المعلومة كاملة...  يعني لو طلعت من الكلية ملقتش شغل  تبع القسم بتاعك او مش حابب القسم ومش حابب شغله تقدر تشتغل علي نفسك وتتعلم اي مجال تاني من مجالات البرمجة تكون انت بتحبها

نصيحة :ياريت تدخل القسم علشان انت حابه او حابب البرمجة عموما او عندك استعداد انك تتعلمها حتي لو متعرفش عنها حاجة خالص
 الفكرة انك لو داخل وعايز تتعلم هتقدر تثبت نفسك في الكلية لكن لو داخلها وانت مش حاببها وداخلها استخصار مجموع بلاش تدخلها علشان هتتعب فيها ...بالمناسبة الكلية حلوة جدا والمواد بتاعتها حلوة وممتعة في دراستها بس انت حبها واجتهد فيها ..وشغلها حلو جدا ومتوفر في كل حته (ده بالنسبة للاقسام العامة او اي مجال انت عايز تتعلمه مع نفسك سواء اندرويد, ويب ....الخ ،لاني زي مقولت فوق المجالات دي الطلبه بتتعلمها بنفسها سواء كورسات بره او من النت وانت بما انك واخد الاساسيات في الكلية زي طلبة عام تقدر برضو تتعلمها بعيد عن الكلية وتشتغل بيها ) مش مهم انت في قسم ايه المهم انك حتي لو مش حابب القسم بتاعك تقدر تشتغل في حاجة تاني مع نفسك والكلام ده هتفهمو اول متدخل الكلية

ثالثا :التقديم في الكلية

التقديم بيكو ن كالاتي
اولا الكلية مش هتنزلك في التنسيق لانك علمي علوم 
بعد مالنتيجة بتظهر انت بتقدم في اي كلية في التنسيق حسب مجموعك بعد ما تتقبل في كلية معينة بتروح المبني الاداري في الجامعة اللي اتقبلت فيها وتعمل طلب تحويل من الكلية اللي اتقبلت فيها الي القسم الخاص (نظم معلومات حيوية)
 في كلية الحاسبات والمعلومات وبعد كده ورقك بيتحول للكلية وفيه جامعات بتعمل تنسيق داخلي   وبيختارو الطلبة علي حسب العدد اللي هما عيزينه والطلبة اللي بتقبلو بيبعتولهم ، وفيه جامعات مبتعملش تنسيق داخلي وبيقبلو اللي جايبين مجموع حاسبات عادي .

رابعا مصاريف الكلية :

 :ودي مصاريف الجامعات السنة اللي فاتت

جامعة المنوفية 12الف في السنة
جامعة كفر الشيخ 18 الف في السنة
جامعة المنيا 13 الف في السنة
جامعة القاهرة 30 الف في السنة
جامعة اسيوط 22 الف في السنة
جامعة المنصورة 18 الف في السنة

جامعة عين شمس 30 الف في السنة

#تحياتي

محمود سيد يوسف

طالب بكلية الحاسبات والمعلومات قسم المعلوماتية الحيوية جامعة اسيوط